Sādhanamālā 1: 29

Sādhanamālā (no. 7) from B. Bhattacaryya, Sādhanamālā, 2 vols. (Baroda, 1925-28)

padma-kul=odbhavaṃ nāthaṃ sarvajña-kṛta-maulinam| praṇamya sādhanaṃ vakṣye sarva-roga-vināśanam| prathamaṃ tāvad ācāryānugatā siddhiḥ|

tasmāc ca sarvabhāvena guruṃ pūjayed yatnataḥ| guruṇā parituṣṭena karma-siddhiḥ prajāyate||

maṇḍala-praviṣṭasya siddhir anujñātā ca sarvathā | svasamayasamvaraṃ rakṣayan sidhyate dhruvam||

mukha-śaucādi-pūrvakaṃ deva-gṛhe paṭādi-gata-bhaṭṭārakam avatārya sva-hṛdaye ādyakṣareṇa candra-maṇḍalaṃ tasy=opary aṣṭa-masya caturthakaṃ bījaṃ saptama-dvitīyen=āsanaṃ prathama-caturthena maṇḍitaṃ ṣoḍaśena saṃyuktaṃ śuklavarṇam manoramaṃ||

tato viśvaraśmīn niścārya tai raśmibhir niṣpannān gurubuddhamūrtīn dṛṣṭvā pūjayitvā abhivandya cānena mantreṇa || oṃ vajrapuṣpe hūṃ | oṃ vajrapuṣpe hūṃ | oṃ vajrapuṣpe hūṃ | oṃ vajrapuṣpe hūṃ |

tato ratnatrayaṃ me śaraṇaṃ sarvaṃ pratidiśāmy agham| anumode jagatpuṇyaṃ buddhabodhau dadhe manaḥ ||

ābodheḥ śaraṇaṃ yāmi buddhaṃ dharmaṃ gaṇ=ottamam| bodhau cittaṃ karomy eṣa svaparārtha-prasiddhaye||

utpādyāmi paramaṃ vara-bodhicittaṃ nimantrayāmi bahusarvasattvān| iṣṭāṃ cariṣye vara-bodhicārikāṃ buddho bhaveyaṃ jagato hitāya|| iti|

praṇidhipūrvakaṃ sarva-dharma-nairātmyaṃ bhāvayet| anena mantreṇa| oṃ śūnyatā-jñāna-vajra-svabhāvātmako ‘ham| bījaṃ māy=opamākāraṃ traidhātukam aśeṣataḥ| dṛśyate spṛśyate caiva yathā māyā hi sarvataḥ| na c=opalabhyate caiva sarvasya jagataḥ sthitiḥ|| ity adhimucya|

tato ‘nādiākālīnam asat kalpanābījam apanīya svabhāvam adhimuñcet| oṃ svabhāvaśuddhāḥ sarvadharmāḥ svabhāvaśuddho ‘ham||

tataḥ pūrv=oktabījaniṣpannaṃ padmaṃ tasyopary hrīḥkāraṃ tatsarvaniṣpanne sati śrīmall=okanāthaṃ vajra-padma-garbha-candra-sthaṃ vajra-paryaṅkaṃ śaśiprabhaṃ kundendu-varṇaṃ ujjvalaṃ jaṭā-makuṭa-dharaṃ śāntaṃ amitābha-kṛta-śekharaṃ vyāghra-carma-nivasanaṃ catur-bhujaṃ nān=ālaṅkāra-bhūṣitaṃ dvau hastau saṃyuktau sarva-rājendra-mudrayā hṛdi saṃsthitaṃ| tato ‘haṅkāraṃ kuryāt|| aham eva lokeśvara iti||

tato jñāna-sattvam ākṛṣya yath=opadeśataḥ svamantreṇ=ārghyapādy=ādikaṃ dadyāt| samāja-mudrayā ekīkṛtyānena mantreṇa saha vinyaset| oṃ surata-vajra alalalala hoḥ samayas tvaṃ samayas tvaṃ samayam aham|

yath=opadeśato ‘bhiṣeka-kavaca-paṭṭabandh=ādhimokṣaṇa-samakālapūjāstutiñ ca kṛtvā bhāvanāpūrvakaṃ japaṃ kuryāt|

svahṛdi candropari ṣaḍakṣaraṃ pradīpamālām iva gṛhāntaradyotinīṃ paśyet| mantraḥ| oṃ maṇipadme hūṃ| akṣaralakṣaṃ japet| tato dvitīya-tṛtīyena vigatakalmaṣo bhavati pañcānantaryakāriṇo ‘pi koṭijāpena siddhyati|

tata utthātukāmo ‘rghādikaṃ dattvā viśiṣṭ=āhaṅkāreṇa viharet| catuḥsandhyaṃ japitvā kuśalamūlam pariṇamyā=bhipretasiddhaye ‘rdharātrau jñānasattvaṃ visarjya śatākṣaraṃ coccārya kāyavākcittarakṣāṃ ca kṛtvā yathāsukhaṃ vihared iti |

yadi rogādiṃ nāśayitum icchati tadā yathopadeśataḥ puṣya-nakṣatreṇ=āptitagomayena bhaṭṭārakasy=āgrataś caturasraṃ maṇḍalakaṃ kuryāt| abhipreta-ṣaḍ-akṣara-vidarbhitam aṣṭottaraśataṃ japet| ṣaṇ-māsena sidhyati na saṃśaya iti|

|| kāraṇḍavyūhām nāyena racitaṃ sādhanaṃ samāptam||